“L’aragonesismo progresista ha contrimostrato que conta con os grupos d’intrés: as entidaz zivicas que desfienden os ODS. Ixo ye un eixemplo de Responsabilidat Sozial Corporativa cuan se tiene presenzia en o gubierno u presenzia en a oposizión en as Corporazions locals u atras alministrazions”.

Talmén no pareixca de buen chudizio oposar mercatotecnia -Mkt- e Responsabilidat Sozial -RSC- perque, en primeras, son compatibles: mientres que o Mkt ye una técnica de mercato e difusión, a RSC ye un modelo sozial de chestión con Ochetivos de Desenrollo Sostenible -ODS- e que conta con os grupos d’intrés implicatos en ixos ODS.

Os Gubiernos d’o PP (autonomicos e locals) creban o triple balanze de sostenibilidat sozial, economico e medioambiental: retallando servizios publicos e favoreixendo recursos naturals en benefizio economico de grans interpresas, més que més, foranas. Achiquen y enfoscan os ODS con Mkt emocional -fatezas grandilocuens, emborbozos aparens como maquillaches verdes (Bosque de los Zaragozanos)- perque no se creyen a chestión RSC: mesmo han acotolato o siello RSA que creyó o Gobierno PSOE-CHA (a DGPL bi incluyó criterios de sostenibilidat lingüística)

Debán d’ixo l’aragonesismo rechionalista no suposa una opzión guaire diferenziata perque a suya ideolochía liberal e conservadera conzerta con a chestión d’o PP. E talmén per ixo ye despareixendo baixo una nueva opzión d’aragonesismo provinzialista que tampoco no consigue creixer guaire: antis representó a protesta manimenos, no se reconoixe en l’aragonesismo istorico, no plega a definir-se de traza platera entre lo liberal e lo sozial, e no fa una proposa esclatera de modelo de país p’Aragón.  

Ista ye a oportunidat de l’aragonesismo progresista. Talmén debán d’as tendenzias rezentralizaderas, masclistas, edadistas, negazionistas, desarrollistas, autoritarias… retaculaderas… cal tornar enta o esprito aragonesista: a nuestra identidat como país ye vinculata á fueros, libertaz e chustizia;  

Manimenos os resultatos de l’aragonesismo progresista en votos no son tan buenos como a calidat d’os suyos programas electorals. E no ye fázil ragonar os diferens motivos: talmén un d’els siga relazionato con a nezesidat de fer que o mensache plegue en a soziedat.

A esperienzia mos diz que fer servir o Mkt nunca no ha resultato guaire. Ya sabemos que o Mkt ye un invento de mercato que fa fincapiet en emozionar de traza impulsiva en campaña electoral -convertindo os partidos politicos en marcas á consumir e a es votans en consumidors- per denzima de ragonar de proyeutos á comunal mientres cuatre años de lechislaturas: e que ixe chuego siempre lo ferán millor qui més diners tienga pa invertir-ie. Anque no puede preszindir-se d’o Mkt en as campañas electorals cal emplantillar un Mkt sozial, que responda a una comunicazión sozialmén responsable -RSC-

Ye conoixito que a mayor parte d’a comunicazión que prevale ye “no verbal”: lo que se fa millor que no lo que se diz. E profes, en cada votante de l’aragonesismo progresista, a coderenzia d’o que se diz con o que se fa… e ye muito més desichén pa penalizar con l’abstenzión cuan siente falta de coderenzia u de compromís con as promesas.

L’aragonesismo progresista ha contrimostrato que conta con os grupos d’intrés: as entidaz zivicas que desfienden os ODS. Ixo ye un eixemplo de Responsabilidat Sozial Corporativa cuan se tiene presenzia en o gubierno u presenzia en a oposizión en as Corporazions locals u atras alministrazions. E mesmo cuan no se tiene presenzia en as instituzions también cal contar con as entidaz zivicas como azión de Responsabilidat Sozial Comunitaria perque aduya a conoixer as nezesidaz d’ixa comunidat (local, comarcal, nazional…) e amanar á ra poblazión á o modelo de país sostenible que proposa l’aragonesismo progresista.

Ixa coderenzia d’o que se diz contando con as entidaz zivicas cal retaliniar-lo también con os feitos coderens con os ODS dende a Responsabilidat Sozial Colectiva de l’aragonesismo progresista en as suyas candidaturas, con estratechias audazes que mesmo faigan rebellar á ixe terzio de poblazión abstencionista que talmen considera que os partitos políticos no predican con o eixemplo.

Cayer en o cortoplazismo puede ir cuentra l’obchetivo: L’aragonesismo siempre ha luitato per tener representazión en o “Congreso de Diputados” pa reivindicar a finanziazión que merezemos; as prauticas deszentralizaderas claman per planteyar que de cuan en vez caldrá que a candidatura á ra presidenzia d’Aragón no seiga a cabeza de lista per Zaragoza; o feminismo siempre ha reivindicato crebar o teito de cristal e mereixe encabezar candidaturas; a luita cuentra o edadismo empezimpia per reconoixer a esperienzia de chestión politica en un país con tanta chen gran; e sobre tot, que sin refusar os liderazgos mediaticos a curto plazo. Aragón identifica a suya cultura con proyeutos coleutivos -liderazgos corals e modelos de chestión RSC- e lo reconoixe en a luenga aragonesa cuan emplega esprisions como á comunal, á vezinal, á ixena, u á zofra.